Михаил Михайлович кэпсииринэн агрохолдиҥҥа киирэр 12 тэрилтэҕэ уопсайа 1000-тан тахса үлэһит баар эбит.  Агрохолдинг бу үлэлээбит түөрт аҥаар сылын устатыгар быһаарыллыбыт да ситэ быһаарылла илик да боппуруостар бааллар. Олортон саамай сытыытык турар боппуруос быһыытынан каадырынан хааччыллыыны тоҕоһолоон  Михаил Михайлович бэлиэтиир. Итиннэ тохтоон Людмила Федотовна: “Биһиги хаһаайыстыбабытыгар экофермаҕа эдэр исписэлиис син кэлэ сатыыр да, сороххаалан үлэлиир сорох оҕолор бара тураллар, уһаабаттар. Хамнас төһө да кырата суоҕун иһин. Билигин хаһаайыстыбабытыгар агрохолдинг көмөтө олус улахан. Саҥа техника кэлэр турар. Үлэһиттэри сылын аайы атын регионнарга, киин куораттарга илдьэ сылдьан ол сирдэргэ хаһаайыстыбалар хайдах дьаһанан олороллорун көрдөрөллөр, билиһиннэрэллэр. Ити сүрдээҕин биһиэхэ көмөлөһөр. Саҥа идеялар киирэллэр, сынньанаҕын даҕаны. Чэ, бары усулуобуйа барыта оҥоһулла сатыыр. Эдэр ыччат исписэлиис барыыта бука билиҥҥи кэм охсуутунан ыччат куорат киин сирдэргэ тардыһыытыгар сытара буолуо,”- диэн санаатын үллэстэр. Онтон Виктор Михайлович “Туймаада” производственнай комбинакка эт сыаҕар былырыыҥҥыттан үлэлии сылдьар. Кини: “Билиҥҥитэ барыта үчүгэй курдук, усулуобуйа барыта баар. Үлэлиэххэ сөп. Ити тыаттан ыччат үксүн куорат диэки тардыһыытыттан тахсар дии саныыбын. Сырдык, ыраас, киэҥ-куоҥ дойдуга эдэр дьон син биир кэлэ туруо, хамнас туһунан этэр буоллахха биһиэхэ эдэр специалистарга тэрилтэбит биэрэр хамнаһын таһынан министиэристибэ тыа хаһаайыстыбатыгар баран үлэлиир исписэлиистэргээбии төлөбүрүн ылабыт,”- санаатын этэр. “Хамнас биһиги тэрилтэбитигэр промышленнай оройуоннарга уонна тыа сиригэр үлэлиир хаһаайыстыбаларбытыгар араас-араас буолар, холобур Мииринэй, Нерюнгри курдук оройуоннарга хамнастаах тэрилтэ элбэх, ол иһин биһиги ол таһымтан түспэт политикатын ыытабыт, онон 50-тан 70 тыһ. тиийэ хамнас аахсаллар саҥа тиийэн үлэлиир исписэлиистэр. Онно эбии судаарыстыба көрөр төлөбүрүн аахсаллар.”- Михаил Михайлович санаатын үллэстэр.  «Исписэлиистэр син кэлэн үлэлиэхтэрэ, оробуочай, ыанньыксыт боппуруостара олус ыарахан, дьиҥинэн кинилэр үлэлэрин түмүктэринэн сыаналанан балайда хамнас аахсаллар, ”- Людмила Федотовна тыл кыбытар. Кырдьык хаһаайыстыбаларга үксүлэригэр ыанньыксыттар саастара ыраатан бу саамай тутаах үлэ боппуруоһа сылтан сыл аайы кытаатан иһэр. Бу хайысхаҕа араас быһаарыы ылыллар даҕаны билигин ити аһаҕас турар. Үлэһиттэри дьиэнэн хааччыйыы урукку сылларга федеральнай, республиканскай  программалар үлэлиир эрдэхтэринэ ыччат көхтөөхтүк онно кыттыбыта. «Арай билигин улахан тэрилтэлэр биир сиргэ үлэһиттэргэ дьиэ тутталларын көҕүлүүр сыаллаах программа киирэрэ буоллар син ыччат тохтуо этэ,»-диэн Михаил Михайлович санаатын салгыы этэр. “Оннук программа баара буоллар ыччат тохтуо этэ. Үлэтиттэн чугас сиргэ, бары үлэһиттэр үлэлиир сирбит аттыгар дьиэ тутуннахтарына элбэх ыччат үлэлиэ этэ,”-диэн Хатастааҕы сибиинньэ иитэр комплекс зоотехнига Лукин Дмитрий Дмитриевич кэпсэтиигэ кыттар. «Кырдьык оннук, билигин биһиги тэрилтэбитигэр 70 үлэһит баар, онтон исписэлииһэ 4 эрэ. Аны комплекспыт 37-38 сыллааҕыта тутуллубут буолан олус эргэ, үлэлииргэ ыарахан,»-диэн зоотехник селекционер Корякина Тамара Христофоровна кыттыһар. «Өрөспүүбүлүкэ Ил Дархана Николаев Айсен Сергеевич саҥа свинокомплекс тутуутун өйөөбүтэ. Билиҥҥитэ бырайыак оҥоһулла сылдьар, онон саҥа комплекс тутулларыгар бүк эрэнэбит,» -диэн михаил Михайлович кэпсэтиини түмүктүүр. Бу кэпсэтии кэнниттэн туох түмүккэ кэлиэххэ сөбүй? Ыччаты тыа сиригэр чуолаан тыа хаһаайыстыбатыгар сыһыаран үлэлэтии олус улахан боппуруос. Аҥардас хамнас, үлэлиир усулуобуйа, дьиэ-уот эрэ буолбатах. Манна нэһилиэнньэни кытта үлэ куруутун барыахтаах, нэһилиэктэр, улуустар баһылыктара бу боппуруоска быһа кыттан үлэлииллэрэ кэскиллээх буолуо этэ. Төһөтүн да иһин тыа хаһаайыстыбатын бородууксуйатын оҥоруу суолтата олус үрдээн турар. Онно биһиги төһө бэлэммитий?