Бу ый саҥатыгар дойдубут киин куоратыгар Москваҕа тыа хаһаайыстыбатын уонна астыыр-үөллүүр промышленность үлэһиттэрин күнүн көрсө үгэскэ кубулуйбут “Көмүс күһүн” быыстапка киэҥ далааһыннаахтык ыытыллан ааспыта. Бу 25-с төгүлүн ыытыллар тэрээһиҥҥэ дойду бары регионнарыттан дойду агропромышленнай комплексын ситиһиилэрин көрдөрөр сыаллаах-соруктаах элбэх делегация кэлэн кыттыыны ылбыта. Биһиги республикабыт өрүү буоларын курдук бу улахан тэрээһиҥҥэ актыыбынайдык кытынна. Быйыл ыытыллар быыстапка биир сүрүн уратытынан аан бастаан Тимирязев аатынан РГАУ-МСХА былаһаакканан буолла. Онтон сүрүн тиэмэтинэн аграрнай наука уонна үөрэхтээһин сайдыыта диэн ис хоһооннонно.
Быыстапкаҕа “Туймаада” Агрохолдинг АУо 24 киһилээх делегацията кыттан тэрээһин сүрүн былаһааккатыгар, Калуга уобалаһыгар тахса сылдьан Калуга МТС-гар, үүтүнэн, голштин боруода сүөһүгэ племрепродукторынан уонна үүнээйинэн льарыктанар тыа хаһаайыстыбатын тэрилтэлэрин үлэлэрин көрдүлэр, билистилэр. Онтон делегация иһигэр хампаанньа сүрүн тэрилтэтин исписэлиистэрин таһынан Нерюнгри көтөрү иитэр фабрика, “Бөртө сылгы собуота”, “Кладовая Олекмы”, “Туймаада” ПК, “Туймаада” Экоферма, “Новай с-з” тэрилтэлэр салайааччылара, үлэһиттэрэ сылдьан кэпсэтэн, билсэн бэйэлэрин үлэлэригэр туһаныллыан сөптөөҕүн ылынан бэркэ астыннылар.
Ордук агрохолдинг исписэлиистэрин интэрииэһин астыыр-үөллүүр промышленность технологиятын, оборудование арааһын көрдөрөр “Агропродмаш” быыстапката тарта. Манна быыстапкаҕа туруоруллубут экспозицияҕа сырьеттан саҕалаан бородууксуйа оҥоһуллан тахсыар диэри көрдөрүүгэ туруоруллубут. Биһиги хаһаайыстыбаларбыт үксүлэрэ үүтү-эти астыыр сыахтаахтар, онтон “Туймаада” ПК тыа хаһаайыстыбатын бородууксуйатын үксүн астаан-үөллээн таһаарар комбинат. Онон кинилэр бородууксуйа хаачыстыбатын хонтуруоллуур, суулуур, таҥастыыр, сойутар уонна да атын онуоха сыһыаннаах технологиялары билсэн кэлэр өттүгэр ону бэйэлэрин үлэлэригэр киэҥ, дириҥ толкуй кэнниттэн туһаныахтара турдаҕа. “Туймаада” Агрохолдинг сүрүн сыала сүөһүттэн ылыллар бородууксуйаны биһиги усулуобуйабытыгар муҥутаан үрдэтии. Ол инниттэн төрүүр ынах уопсай сүөһү ахсаанын улахан аҥаарын ыларын ситиһии уонна да атын тэрээһин наукаҕа олоҕурбут аныгы технологияларын туттууну олоххо киллэрэн эрэрэ мэлдьэх буолбатах. Иккиһинэн сүөһүнү аһатыы ньымаларын уонна эбии аһылыгы бэлэмнээһини күүскэ киллэрэр. Ол да иһин делегация кыттыылаахтара быыстапкаҕа кытта кэлбит атын хаһаайыстыбалар бэрэстэбиитэллэрин кытары билсэн дириҥник кэпсэттилэр. Үүнээйинэн анаан дьарыктанар Калуга МТС үлэтин бэркэ сэҥээрдилэр. Манна сири таҥастааһыҥҥа, хорутууттан саҕалаан ыһыыга тиийэ ураты ньымалары тутталлара биһиги исписэлиистэрбитигэр туһалаах уопуту биэрдэҕэ буолуо. Онон бу быыстапкаҕа сылдьыы агрохолдинг хаһаайыстыбаларын үлэһиттэригэр элбэх саҥаны, билиини-көрүүнү биэрэн инники өттүгэр бородууксуйаны оҥорон таһаарыыны өссө үрдэтэллэригэр тирэх буолара саарбаҕа суох.
