От үлэтэ түмүктэнэн, күһүҥҥү хомуур үмүрүйэн хаһаайыстыбалар кыстыкка киирээри бэлэмнэнэ сылдьаллар. Быйыл сүрдээх үчүгэй сайын туран өрөспүүбүлүкэҕэ хаһааҥҥытааҕар да элбэх от оттонно. Билигин хаһаайыстыбалар сайыҥҥы, күһүҥҥү үлэлэрин бэрийэн сыл саҕаланыаҕыттан үлэлэрин түмүктэрин ааҕына сылдьаллар. Олор истэригэр бу сыл аҕыс ый түмүгүнэн “Туймаада” Агрохолдинг биир бөдөҥ хаһаайыстыбата “Туймаада” Экоферма ХЭТ куһаҕана суох көрдөрүүлэрдээх.
Тэрилтэ отчуттара 2500 туонна от былааннаахтарын аһара толорон 2938 туонна оттоох кыстыкка киирэн эрэллэр. Онон былаан 117бырыһыан туолбут.
Ону таһынан сиилэстэрин 3000 туоннаны укпуттар. Былааннарын 100 бырыһыан толорбуттар.
Итини таһынан сенаж бэлэмнээһинигэр хотуулаахтык үлэлээн былааннарын 195 бырыһыан толорбуттар. Ол курдук былаан 410 туонна буолуохтааҕын 802 туонна сенаж бэлэмнэммит.
Онон кыстыкка толору астаах киирэр кыахтаммыттар. Манна биири бэлиэтээн этиэххэ наада, быйыл суданка ото сүрдээх хойуутук үүнэн, барыллаан ааҕыынан гектартан ортотунан 134 ц хомуллубут.
Онтон эбиэс быйыл хаһааҥҥытааҕар да хойуутук үүнэн сорох сиринэн гектартан 140-150 ц тиийэ үүнүүнү ылары ситиспиттэр.
Ол курдук хомуур бастакы күннэригэр “Холбуйа” бааһынатыгар бастакы 3 гектар сиртэн 83 рулон ылбыттар. Биир рулон ыйааһына 520 киилэ буоллаҕына 431 ц буолар. Ол аата 1 гектартан 143 ц хомуллубут. Бу ньүөлсүтүллүбэт бааһынаттан үрдүк үүнүүнү ыларга тэҥнэһэр. Уопсайынан эбиэһи ортотунан гектартан 101 ц хомуйбуттар.
Тэрилтэ бааһыналары сөргүтүүгэ күүскэ ылсан үлэлиир. Ол курдук быйыл 576 га бааһынаны сөргүтүүгэ механизатордар тохтообокко үлэлии сылдьаллар. Бу сылга 15 км саҥа күрүө тутуллубут. 310 гектар сири хорутан эһиилги сылга бэлэмнии сылдьаллар.
Тэрилтэ хаһаайыстыбаларыгар Тулагы Киллэмҥэ уонна Нөмүгүгэ 1314 ынах сүөһү турар. Итинтэн ыанара 558 төбө. Быйылгы сылга икки хаһаайыстыбанан 365 төрүөх ылыллыбыт. Үүт ыаһыныгар сыллааҕы былаан 1519 туонна. Бу сыл аҕыс ыйын түмүгүнэн барыта 1094 туонна үүт ыаммыт. Бу кэм устата 964 туонна үүт туттарыллан былаан 101 бырыһыан туолбут. Онон “Туймаада” экоферма икки хаһаайыстыбатыгар бары үлэһиттэр былаан туолуутугар бигэ эрэллээхтик үлэлии сылдьаллар.
Прокопий ХАБАРОВ
