Быйылгы “Кымыс – Айыы Аһа” саха төрүт утаҕын тилиннэрэр, сөргүтэр уонна пропагандалыыр сыаллаах 10-с төгүлүн ыытыллар бэстибээл бэрт тэрээһиннээхтик ыытыллан түмүктэннэ. Бу тэрээһини Туймаада ыһыаҕар туһунан түһүлгэ быһыытынан бастаан утаа Дьокуускай куорат дьаһалтата ыыппыта, онто салгыы “Туймаада” Агрохолдинг 2019 сылтан ыытан кэллэ. Онон быйылгы 2025 сылга биллэр төрүөттэринэн тохтуу түһэн баран 8-с төгүлүн ыытылынна.
Бу бэстибээлгэ быйыл 11 кымыс оҥорор хаһаайыстыбалар, ИП-лар Хаҥаластан, Уус Алдантан, Горнайтан, Тааттаттан, Мэҥэ Хаҥаластан, Намтан, Дьокуускайтан кэлэн кымыстарын көрдөрүүгэ туруоран 1000-тан тахса киһи кымыһы амсайан сыанабыл биэрдилэр. Кинилэр бары бэстибээл иннинэ бородууксуйаларын анаалыстатан, биэни ыыр, кымыһы оҥорор ньымаларын билиһиннэрэн бэстибээлгэ кытыннылар. “Кымыс Кырдала” түһүлгэ өрүү буоларын курдук киэркэтиллэн, кыттааччылар да бородууксуйаларын туруорар остуоллара, миэстэлэрэ дьөһөгөйгө сыһыаннаан араас туттар малы-салы, хаһаайыстыбаларын көрдөрөр стендэлэрэ ыалдьыттары тумэ тардан чахчы бырааһынньыктыы эйгэ үөскээн ыһыаҕы киэркэтиэн киэргэттэ.
Үгэс быһыытынан бу түһүлгэҕэ өрөспүүбүлүкэ бас-көс дьоно, Ил Дархан бэйэтинэн кэлэн ыалдьыттаан өрөспүүбүлүкэбит салалтата норуот үгэһин умнубаттарын, болҕомто уурулларын көрдөрдө.
Бэстибээл түмүгүнэн “Кымыс оҥоруутун үгэстэрин тилиннэрии” номинацияны “Турантаева М.П.” ИП КФХ Турантаева Мария Петровна Уус Алдан, Бээрийэ нэһилиэгэ ылла. “Быыстапка турар миэстэтин киэргэтии” номинацияны Дьокуускайтан Сидоров Виктор Семенович ылла. Мэҥэ Хаҥалас Табаҕа нэһилиэгиттэн сылдьар “Тумарык” бааһынай хаһаайыстыба баһылыга Васильев Поликарп Петрович “Кымыһы оҥоруу презентацията” номинация хаһаайынынан буолла.
Таатта улууһуттан “Кыһыл Кулаада” бааһынай хаһаайыстыба (баһылык Варламов Петр Иванович) бэстибээлгэ хаһыс да кыттыыта. Кини “Кымыс оҥоруу династията” номинацияны ылла. Онтон саамай элбэх кымыһы оҥорооччу быһыытынан “Эйгэ” бааһынай хаһаайыстыба баһылыга Васильев Павел Павлович аата ааттанна. Онон кини “Элбэх кымыһы оҥоруу уонна батарыы” диэн номинацияҕа тигистэ.
Бэстибээл кыайыылааҕынан Хаҥалас улууһун Өктөм нэһилиэгиттэн “Улахан Алаас” бааһынай хаһаайыстыба баһылыга Лиханов Марк Прокопьевич буолла.
2-с миэстэҕэ Горнай улууһуттан бааһынай хаһаайыстыба баһылыга Федоров Валерий Иванович таҕыста.
3-с миэстэ хаһаайынынан “Бөртө сылгы собуота” ХЭУо (дириэктэр Павлов Александр Васильевич) буолла.
Ону таһынан бары кыттааччылар анал дипломнарынан, сертификаттарынан, сыаналаах бириистэринэн наҕараадаланнылар.
Онон бэстибээл олус тэрээһиннээхтик ыытыллан бэйэтин сыалын-соругун ситтэ.
Бэстибээли тэрийээччи уонна ыытааччы “Туймаада” Агрохолдинг АУо норуот үгэстэрин тилиннэриигэ уонна сөргүтүүгэ ыытар тэрээһинэ “Кымыс – Айыы Аһа” бэстибээл сыалын-соругун ситтэ уонна Туймаада ыһыаҕар туһунан түһүлгэ быһыытынан ыытыллан Үрүҥ Тунах Ыһыаҕы олус киэргэттэ.
***
Прокопий ХАБАРОВ
Читайте также
