Күннэр туран биэрэн бааһыналарга тыраахтырдар биир кэм буору будулутан киэҥ сиринэн төттөрү-таары сүүрэн үлэ күөстүү оргуйа турар. Бу күннэргэ «Туймаада» Агрохолдинг хаһаайыстыбалара сааскы ыһыы хампаанньатын ыытыыга бэлэмнэнии сүрүн үлэлэрин түмүктээн ыһыыга киирэн эрэллэр. Ол курдук «Бөртө сылгы собуота» хаһаайыстыба бааһыналарга ыам ыйын 18 күнүгэр удобрение киллэрэн тарҕаппыт. Онтон ыам ыйын 20 күнүгэр ыһыы иннинээҕи үлэлэри ыытан баран 21-кэ ыһыыны саҕалаабытын туһунан биллэрэллэр. Бүгүҥҥү туругунан сэлиэнньэ аттынааҕы 510 га бааһынаттан 254 гатын ыһан бүтэрбиттэр. Ордугун бүтэрэн баран арыыларга баар 240 га ыһыыны саҕалыахтара. Бу хаһаайыстыба былаан быһыытынан 750 га сиргэ ыһыы ыытыахтаах.
«Туймаада» Экоферма ХЭУо былаана 848 га. Билиҥҥитэ 162 га бааһына ыһыыга бэлэмнэниллэн сытар. Бу ый 24 күнүнээҕи туругунан 44 га сиргэ ыһыы үлэтэ ыытыллыбыт. Ити сыыппара 3-4 күн устатыгар балайда уларыйбыт буолуохтаах.
«Кладовая Олекмы» ХЭУо быйылгы сылга 763 габааһынаҕа ыһыы үлэтин ыытарга былааннанар. Билигин бааһыналарга ыһыы иннинээҕи үлэлэри уонна удобрениены тарҕатыы үлэтин ыыта сылдьаллар. Уонна бу күннэргэ ыһыыга киириэхтэрэ.
Новай сопхуос» АУо ыһыыны арыыйда хойутаан, сир үчүгэйдик куурбутун кэннэ саҕалааччы. Сопхуос быйылгы былаана 367 га. Хаһаайыстыба бу ый 25 күнүнээҕи туругунан 20 га сиргэ ыһыы үлэтин ыыппыттар. Онон агрохолдинг хаһаайыстыбалара былаан быһыытынан 2943 га сиргэ ыһыы үлэтин ыытыахтаахтар. Итини таһынан 1092 га бааһына чөлүгэр түһэриллиэхтээх. Ити курдук быйыл туруоруллубут сорук улахан. Хаһаайыстыбалар ити туруоруллубут соруктары толорууга 85 тиэхиньикэни, ол иһигэр 37 тыраахтыры уонна 48 соһуллар тиэхиньикэни үлэлэтииэхтэрэ. Уматыгынан толору хааччынан олороллор.
***
Прокопий ХАБАРОВ
Источник: Aartyk.ru
Читайте также
