Бу күннэргэ «Туймаада» Экоферма Нөмүгүтээҕи отделениетын тырахтарыыстара хаһаайыстыба биир киэҥ бааһынатыгар Моойдооххо киирэн үлэ тигинэччи бара турар. Быйылгы былаан улахан. Ол курдук экоферма үрдүнэн 826 га сиргэ ыһыы ыытыллыахтаах. Ол иһигэр Дьокуускайдааҕы отделениеҕа 354, Нөмүгүгэ 382 уонна Намҥа 90 га сиргэ подсолнух, суданскай от уонна эбиэс ыһыллыаҕа.
Дьокуускайдар өссө ыам ыйын 26 күнүгэр ыһыыларын саҕалаан бу күннэргэ тэйиэс сытар бааһыналарга үлэлии сылдьаллар. Онтон Нөмүгүлэр күнү-дьылы уонна сир сөбүгэр түһэрин кэтэһэн бэс ыйын 5 күнүгэр бааһыналарга киирдилэр. Былаан быһыытынан мантан 3500 тн сиилэс уонна 850 тн сенаж бэлэмнэниэхтээх. Күн-дьыл эрэ сөбүгэр ардаан, куйааран биэриэн наада. Үлэтин туруу үлэһит хаһаайыстыбалар механизатордара, кинилэр көмөлөһөөччүлэрэ кыайа тутуохпут диэн бигэ эрэллээхтэр.
Техника чааһынан эттэххэ сылын аайы техника саҥардыллан, өрөмүөннэнэн хааччыллыы үчүгэй. Былырыын Нөмүгүгэ саҥа К-700 тыраахтыр ылыллан тыа хаһаайыстыбатын министиэристибэтин кормопроизводство бырагырааммытынан соһуллар техника, булуук ылыллан сири үчүгэйдик оҥорор эбит диэн механизатордар хайгыыллар. Онон тэрилтэ үс подразделениетынан үлэ күүскэ бара турар. Төһө да уустук, ыарахан кэм буолбутун иһин агрохолдинг салалтата сөптөөх дьаһаллары ылынан быйыл кэмигэр уматык, сиэмэ бурдук, саппаас чаас кэлэн былаан туоларыгар үлэһиттэр туруоруллубут соругу толорууга туруулаһан туран үлэлииллэрэ былаан туолуутугар эрэли үөскэтэр.
***
Прокопий ХАБАРОВ
Читайте также
