Бу ый 6-13 күннэригэр Саха сириттэн Калининград куоракка Кенигсберг иһин кыргыһыы кыттыылаахтарын оҕолоро, сиэннэрэ тиийэн Кенигсберг эппэрээссийэтигэр охтубут буойуттар мемориалларыгар сибэкки дьөрбөтүн уурдулар. Бу тэрээһин 1941-1945 сылларга Аҕа дойду улуу сэриитигэр улуу кыайыы ситиһиллибитэ 80 сылыгар анаммыт “Сахалар Кенигсберг иһин кыргыһыыга” диэн бырайыак чэрчитинэн уонна Аҕа Дойдуну көмүскээччилэр сылларыгар ананна. Онно сылдьыбыт дьон бу киэҥ, дириҥ ис хоһоонноох бырагырааммалаах тэрээһини оҥорбут дьоҥҥо, Өлүөхүмэ улууһун землячествотын салайааччы Лидия Ивановна Алексееваҕа, Калининград куоракка олорор биир дойдулаахтарбыт землячествотын салайар Туяра Егоровна Ивановаҕа дириҥ махталларын тиэрдэллэр.
Алта күн иһигэр «Кенинсберг саха сирин олохтоохторун дьылҕатыгар» диэн төгүрүк остуол ыытылынна, саха сирин бөлөҕө Балтийскай флот базатыгар сырытта, саха буойуттара көмүллэн сытар Корнево уонна Черняховск бөһүөлэктэригэр уонна да атын тэрээһиннэргэ сылдьан мемориалларга, пааматынньыктарга сибэкки дьөрбөтүн уурдулар. Биир улахан тэрээһининэн Калининградскай уобалас госпиталларыгар эмкэ сытар анал байыаннай дьайыы кыттыылаахтарын көрсүү буолла. Онно сылдьан Туймаада Агрохолдинг тэрийэн ыыппыт баһыылкаларын хорсун буойуттарга туттардылар.Эмкэ сытар биһиги биир дойдулаахтарбыт бары Туймаада Агрохолдинг салалтатыгар, кэлэктиибигэр төрөөбүт дойдуларыттан минньигэс бэлэхтэрин иһин дириҥ махталларын тиэрдэллэр. Барыларыгар кытаанах доруобуйаны, уһун олоҕу баҕаралларын этэллэр.
Читайте также
