Мин урут сопхуос саҕана үлэлээбит дьон үлэҕэ сыьыаннарын, эппиэтинэстэрин көрө-көрө ытыктыыр санаам өссө күүһүрэр. Билигин сүөһү-сылгы ииттэн олорор дьон үксүлэрэ урут сопхуос саҕанааҕы үлэни үлэлэспит, ааспыт дьон. Аны туран кинилэр оҕолорун_ урууларын тыа хаһаайыстыбатын үлэтигэр уһуйан билигин кинилэр солбук буолан эрэллэр. Ол да иһин кинилэри удьуордаан бу кэмҥэ кэпэрэтииптэргэ улэлиир, бааһынай хаһаайыстыба тэринэр эдэр дьонбаар буоллулар. Кинилэр үксүлэрэ дьоннорун суолларын батыстылар.
Бүгүн кэпсиир киһим сопхуоска оҕуруот, сүөһү салаатыгар үлэлээбит Мария Степановна Романова. Кини төрөөбүт дойдута биир ураты кэрэ айылҕалаах Өймөкөөн оройуона. Ол саҕана сопхуос өрө тигинээн үлэлиир кэмэ буолан, нэһилиэк дьоно бары сопхуоска үксүн үлэлиир этилэрэ. Мария Степановна аҕата Степан Афанасьевич Сивцев оччолордооҕу дьон сиэринэн сааһын тухары сылгыга, субан сүөһү көрүүтүгэр үлэлээн үрдүк кирбиилэри ылыыга үлэлэспит аҕай киһи. Онтон ийэтэ Екатерина Семеновна уон оҕолоох герой ийэ. Кини эмиэ сопхуоска ыанньыксыттаан, ньирэй көрөн үлэ бөҕөтүн үлэлээбит. Оҕолор ийэлэрин, аҕаларын батыһа сылдьан тэҥҥэ үлэлэһэллэрэ. Ол да иһин Мария Степановна тыа ъхаһаайыстыбатын араас үлэлэригэр оҕо эрдэҕиттэн сыстан үлэлээбитэ. Мария улаатан баран биир кэмҥэ эдьиийигэр Хаҥаласка кэлэр. Бу дойдуну сөбүлээн хаалан үлэҕэ киирэргэ сананар. Онон 1996 сыллаахха Покровскайдааҕы опытнай производственнай хаһаайыстыбаҕа үүнээйи олордуутугар үлэлээн барар. Эдэр эрчимнээх кыыс ыарахаттартан чаҕыйбакка үлэни өрө тутан түсүһэн барар. Ити кэмҥэ онно тракториһынан Егор Афанасьевич Романов үлэлии сылдьара. Эдэр дьон бэйэ-бэйэлэрин сөбүлүү көрөн олохторун холбоон билигин 4 оҕону төрөтөн улаатыннаран кэллилэр. Ол тухары тыа хаһаайыстыбатыттан арахсыбакка билигин “Туймаада” Экоферма Нөмүгүтээҕи отделениятыгар үлэлии сылдьаллар. Билигин да таптыыр идэтинэн ньирэйдэри көрөн күҥҥэ 700-800 гр тиийэ привеһы ыла олорор.
Мария Степановна уонна Егор Афанасьевич оҕолорун бэйэлэрин идэлэригэр уһуйан тыа хаһаайыстыбатын үлэтин кыайа-хото үлэлиир, солбук дьон улаатан эрэллэр.Билигин биир уола Валентин субан сүөһү көрөөччүтэ. Мария Степановна тыа хаһаайыстыбатын биир ыарахан үлэтигэр сүөһү салаатыгар үлэлээн үрдүк көрдөрүүлэри ситиһэн өрөспүүбүлүкэ тыатын хаһаайыстыбатын министиэристибэтин, “Туймаада” Агрохолдинг АУо, “Туймаада” Экоферма ХЭТ, нэһилиэк бочуоттаах грамоталарынан, бэлиэлэринэн, махтал суруктарынан наҕараадаламмыта. 2015 сыллаахха улууһугар үлэҕэ ситиһиилэрин иһин Нөмүгү нэһилиэгин дьаһалынан “Человек года 2015” аат иҥэриллибитэ. Ити курдук үтүө киһи Мария Степановна Романова үлэҕэ саҥаттан саҥа кирбиилэри ылан ыччат дьоҥҥо холобур буолар.
Читайте также
