1922 сыллаахха муус устар 27 күнүгэр Былатыан Ойуунускай, Максим Аммосов, Исидор Барахов, Степан Аржаков уо.д.а. курдук норуот тумус туттар дьоно – уопсастыбаннай уонна бэлитиичэскэй диэйэтэллэрбит – күүстээх туруорсууларынан Саха Автономнай Сэбиэскэй Социалистическай Өрөспүүбүлүкэтэ төрүттэммитэ. 1992 сыллаахха бу күн Саха Өрөспүүбүлүкэтин Төрүт сокуона олоххо киирбитэ. Бэлиэ суолталаах бырааһынньык Саха сирин баай устуоруйатын, хатыламмат кэрэ айылҕатын, саамай сүрүнэ – кыайыылаах-хотуулаах, ситиһиилээх дьонун-сэргэтин киэн туттааччылары барыларын түмэр. Саха Өрөспүүбүлүкэтин күнүн сиимбэлэ – норуот сомоҕолоһуута. Биһиги түмсүүлээх, бэриниилээх буоларбыт, үлэни таптыырбыт өрспүүбүлүкэбит салгыы сайдарыгар, дьонун-сэргэтин олоҕо тупсарыгар, уопсастыба бигэ тирэхтээх, чөл куттаах буоларыгар олук буолар.

Саха сирин олохтоохторугар бөҕө доруобуйаны, дьиэ кэргэҥҥитигэр дьолу-соргуну, үлэҕитигэр-хамнаскытыгар ситиһиини, табыллыыны баҕарабын! Төрөөбүт дойдубутугар тапталбыт Сахабыт сирин сайыннарарга, саҥа аартыктары арыйарга сирдээтин!

“Туймаада” агрохолдинг АУо генеральнай дириэктэрэ Пётр Семёнович Ефремов.