Балаҕан ыйын 24-25 күннэригэр Дьокуускай куорат комсомольскай болуоссатыгар “Ас-үөл 2022”өрөспүүбүлүкүтээҕи тыа хаһаайыстыбатын дьаарбаҥката тэрээһиннээхтик ыытыллан ааста.
Манна барыта 17 оройуонтан уонна Дьокуускайтан 170-тан тахса тэрилтэ кыттыыны ылан уопсайа 40 мөл. сууммалаах 200 туоннаттан тахса бородууксуйа атыыламмыт.
Бу дьаарбаҥкаҕа “Туймаада Агрохолдинг” АУо хаһаайыстыбалара бэрт ситиһиилээхтик кытыннылар. Ол курдук “Хатастааҕы сибиинньэ иитэр комплекс” ХЭТ үрдүк хаачыстыбалаах деликатестары оҥоруу иһин номинацияҕа “ыыһаммыт сибиинньэ ойоҕоһо” бородууксуйа иһин 1 степеннээх дипломунан наҕараадаланна.
Онтон “Новай совхоз” ХЭТ “Үүттэн оҥоһуллар үрдүк хаачыстыбалаах бородууксуйалар”номинацияларыгар 20%-наах сүөгэйэ 2-с степеннээх дипломунан бэлиэтэннэ. Итинник дипломунан “Сайсары” АУо Нерюнгритааҕы көтөрү иитэр фабриката “1-2 категориялаах куурусса сымыыта” уонна “бройлер чоппуускатын кыната” бородууксуйалара бэлиэтэннилэр. 3-с степеннээх дипломунан “Үрдүк хаачыстыбалаах сымыыт бородууксуйата” номинацияҕа “Новай совхоз” АУо кууруссатын сымыыта уонна “Үүт бородууксуйатыттан төрүт аһылыктары оҥоруу”номинацияҕа “Бөртө-Ас” ТХПК суората бэлиэтэнэн наҕараадаланнылар. Тыа хаһаайыстыбатын племенной сүөһүлэрин быыстапкатыгар “Туймаада Экоферма” ХЭТ “Пестрая” диэн сэмэнтээл боруода ынаҕа бэлиэтэнэн 3-с степеннээх дипломунан наҕараадаланна.
Икки күннээх атыы-эргиэн түмүгүнэн агрохолдинг тэрилтэлэрэ барыта 2 мөлүйүөн сууммалаах бородууксуйа атыылаабыттар. Ити курдук Туймаада Агрохолдинг тэрилтэлэрэ өрөспүүбүлүкэтээҕи быыстапкаҕа тэрээһиннээхтик кыттан бэлиэтэнэн үлэлэрэ сөптөөх хайысханан баран иһэрин өссө биирдэ дакаастаатылар.
Источник: Aartyk.ru
